HUT MORIA: Mberu

SI MAN OGEN        : Enden-enden Salomo 1:8-11

1:8 Jika engkau tak tahu, hai jelita di antara wanita, ikutilah jejak-jejak domba, dan gembalakanlah anak-anak kambingmu dekat perkemahan para gembala.
Mempelai laki-laki dan mempelai perempuan puji-memuji
1:9 Dengan kuda betina dari pada kereta-kereta Firaun kuumpamakan engkau, manisku. 1:10 Moleklah pipimu di tengah perhiasan-perhiasan dan lehermu di tengah kalung-kalung. 1:11 Kami akan membuat bagimu perhiasan-perhiasan emas dengan manik-manik perak.

1:8 [Dilaki] Kam kap singuda-nguda si mberuna, ma itehndu kin ingan e? Ikut-ikutlah rarasen e, permakanilah kambingndu deherken kemah kalak permakan. 1:9 O keleng ateku, debet-debet pusuh dilaki ngenehen kam bali ras kuda raja Mesir erngih-ngih ngidah kuda beru-beru. 1:10 Mejile pipindu sembaba ras perhiasen si ipakendu, bage pe kerahungndu si mejile make bura. 1:11 Sibahan pagi emas man perhiasenndu, rikut ras pirak jadi mainenna.

TEMA                     : Sembaba Kinijilen Ras Perbahanen

TUJUN                    : Gelah Moria:

·       Meteh kerna diberu si mberu.

·       Nggit erproses jadi diberu si mberu i bas kegeluhen.

METODE PA           : Diskusi ras erlajar fashion

Kata Penaruh

Ende-enden Salomo igelari Kidung Agung ntah pe Kidung yang terindah, e me sada kitab sibengket ku bas Pustaka Si Badia alu proses si gedang. Sabab i bas kitab enda la lit ituriken ntah pe isingetken kerna Dibata tapi rikutken proses bengketna ku bas Pustaka Si Badia nuriken maka gambaren ngena ate si ituriken arah teptep kata si tersurat e me gambaren Dibata ras bangsaNa (perpulungenNa). Alu nulih ku bas kitab Hosea 1-3 bage pe Jeremia 2:20-3:5 sincidahken maka Dibata ras bangsa Israel desken sekalak perbulangen ras ndehara. Janah i bas Padan Si Mbaru gambaren Ende-enden Salomo enda ncidahken Jesus Kristus selaku pengantin si dilaki dingen perpulungen pengantin si diberu. Si nuriken keleng ate (cinta) siteridah arah kata si ibelasken sekalak singuda-nguda dingen ialoi dilaki si jadi tujun isi pusuh siiturikenkenna. Kekelengen enda desken gayung bersambut, sialo-alon mujiken sada ras sidebanna arah kata kekelengen. Bagin si jadi bahan PA nta enda desken 'cinta bersemi' sangana turah dingen mejile kal man tatapen.

Mpebagesi Pengangkan Kerna Ogen

Nurikena percakapen sekalak singuda-nguda ras sekalak dilaki si atena jadi. I ja ende-enden si pemena kenca si diberu nuriken pusuh, ukur, ngena atena ras pengarapenna si mbages. E maka bagin si dilaki ngaloi dingen nuriken pujin nandangi si diberu. Singuda-nguda si meherga labo singuda-nguda biasa.

·       Singuda-nguda simberuna, i ja i bas mata ras ukur sekalak dilaki, seh kal jilena dingen ngena kal atena. Bagi nina kuan-kuan Melayu 'kaulah cintaku, kaulah bintangku.' Lanai lit idahna diberu si bage jilena i bas matana. Bage me dikune 'cinta' enggo erlebuh dingen pusuh enggo sangkut ku ate ngena.

·       Keleng ate, rehna i bas pusuh si mbages nari, tanda-tandana debet-debet pusuhna, ukuren detak jantungna lanai normal ncidahken pusuh si engena ate nandangi kekelengenna e. La terjeng pusuh, tapi pe seh ku bas sura-sura terdauhen sura-surana. Gambaren hubungen sekalak dilaki ras diberu (suami isteri) enda gambaren hubungen si sehkal jilena. Ersada pusuh ras kula si igambarken ras kuda Raja si erngih-ngih (meringkik) natap kuda beru-beru nuriken isi pusuh ras sura-surana. Lanai terkuasaisa dirina perbahan ngena atena e.

·       Rupa si mejile sembaba ras perhiasen si metunggung dingen cocok ipakena. La erlebihen, la mencolok nuriken beluh kal si ngena atena enda merias dirina. Sederhana tapi sembaba ras rupana, labo ngenehen ergana tapi mehaga, beluh ncibalken diri rikut ras inganna.

·       Mereken janji man si ngena atena. Maka ibahanna pagi perhiasen guna ngkuhi kinijilen singena atena e. Gambaren perhiasen si ipake sekalak diberu i daerah Timur Kuno nai, dem alu perhiasen. Bagi nina kuan-kuan Karo 'ku tiga pagi kita sierga-erga uis man bandu', enda desken kata keleng ate sekalak dilaki si naki-naki (merayu) sekalak diberu si ngena atena.

Banci saja ikataken hubungen sekalak anak perana ras singuda-nguda si sangana 'cinta bersemi' seh dimabuk cinta. Bage min gambaren bangsa Israel ras Dibata ntah pe perpulungen ras Jesus i bas kegeluhen enda. La ate sirang, mujiken sada ras sidebanna, ersada i bas Kata Dibata bage pe pertoton.

Pengkenaina

Naki-naki umumna ilakoken sekalak dilaki man diberu. I bas bahan PA enda teridah hubungen ngena ate sekalak dilaki ras sekalak diberu setara. Duana er ate ngena janah nuriken isi pusuhna alu kata-kata si seh kal jilena. Diberu si mberu, ertina cantik, mejile, la saja teridah arah ayona ntah pe rupana tapi merupa i bas penampilen si sembaba ras perukuren (inner beauty). Sekalak diberu si bagi e me si tuhu-tuhu layak-ayak ntah pe si idarami sekalak dilaki. Bage me perpulungen (Moria) si ngena ate Dibata.

Enda me si jadi perayakenta i bas kegeluhen, ncibalken diri bagi singena ate Dibata. Moria simberu, mejile i bas pusuh dingen nikapken ras njagai kula (merawat) tinepaNa alu mehuli. Genduari enda melala erbagena si banci erbahan rupa reh jilena. Produk-produk skincare melala i bas pasaren, kerina njanjiken erbahan ayota reh jilena. Perbahan la ka melala pengangkanta kerna jenis ras kandungen produk enda maka banci ka jumpa kita si palsu, erbahansa ayonta ceda. Bage pe erbage jenis perhiasen la saja ergana, galang kitikna, modelna, ingan makesa adi la sembaba banci saja lanai mejile si pake. Kerina enda jadi pelengkap kinijilenta selaku diberu tapi perlu siinget maka enda labo si perluna, enda terjeng jile-jile. Janah enda guna ngkuhi peruista (model bajuta). I bas Kalak Karo peruis enda pe mbelin kal mereken kinitunggungen man banta, subuk ku kerja-kerja, ku tiga, ingan erdahin bage pe ku gereja.

Bage me kita ipersingeti gelah mengayak nikapken diri mahan mberu rupa, pusuh ras ukurta siteridah arah kiniteken sekalak moria. Alu bage malem ate perbulangenta natapsa dingen siarapken la pe ndarat ras sibegi belas-belas si romantis, silang-langna cirem ia ngidah kita jadi teman geluhna. Bagi nina Lagu Karo 'ndehara luar biasa.' Moria si ngena kal ate Dibata bage pe isi jabuna.

Metode Diskusi Ras Erlajar Fhasion

1.    Rikutken bahan PA nta, turikenlah, enggo nge kita Moria simberu?

2.    Turikenlah cara peruista dingen darami i bas media gambar ntah pe model si metuggung ras kulanta. Asa bancina i bas HUT Moria enda bahanlah fashion show sederhana ku gereja 'ala Moria.'

Pdt. Suenita br Sinulingga