SI SERI E MEHULI, SI PELAIN-LAIN E MEJILE 

SI MAN OGEN        : Kejadin 4 : 1-7

Kain dan Habel

4:1 Kemudian manusia itu bersetubuh dengan Hawa, isterinya, dan mengandunglah perempuan itu, lalu melahirkan Kain; maka kata perempuan itu: "Aku telah mendapat seorang anak laki-laki dengan pertolongan TUHAN." 4:2 Selanjutnya dilahirkannyalah Habel, adik Kain; dan Habel menjadi gembala kambing domba, Kain menjadi petani. 4:3 Setelah beberapa waktu lamanya, maka Kain mempersembahkan sebagian dari hasil tanah itu kepada TUHAN sebagai korban persembahan; 4:4 Habel juga mempersembahkan korban persembahan dari anak sulung kambing dombanya, yakni lemak-lemaknya; maka TUHAN mengindahkan Habel dan korban persembahannya itu, 4:5 tetapi Kain dan korban persembahannya tidak diindahkan-Nya. Lalu hati Kain menjadi sangat panas, dan mukanya muram. 4:6 Firman TUHAN kepada Kain: "Mengapa hatimu panas dan mukamu muram? 4:7 Apakah mukamu tidak akan berseri, jika engkau berbuat baik? Tetapi jika engkau tidak berbuat baik, dosa sudah mengintip di depan pintu; ia sangat menggoda engkau, tetapi engkau harus berkuasa atasnya."

4:1 Kenca bage ersada kula Adam ras ndeharana, emaka mehuli kula ndeharana ndai. Ipupusna sekalak anak dilaki, emaka nina, "Arah penampat TUHAN nggo dat aku sada anak dilaki." Emaka ibahanna gelarna Kain. 4:2 Kenca si e tubuh ka Abil, agi Kain. Abil jadi permakan biri-biri, tapi Kain jadi perjuma. 4:3 Kenca piga-piga dekah ipersembahken Kain man TUHAN sada bagin asil jumana. 4:4 Abil pe bage ka. Emaka igelehna anak biri-biri si pemenana tubuh, jenari ipersembahkenna bagin-bagin si mehulina man TUHAN. Ngenan ate TUHAN man Abil ras persembahenna, 4:5 tapi Kain ras persembahenna la ialoken TUHAN. Emaka merawa ia, jutjut ayona perbahan nembehna atena. 4:6 Nina TUHAN man Kain, "Ngkai maka kam merawa? Ngkai kam jutjut? 4:7 Adi mehuli perbahanenndu, tentu cirem kam. Tapi erkiteken perbahanenndu jahat, dosa ngerimrim i lebe-lebe pintun. Ikuasaina atena kam, tapi kam arus naluken ia."

TEMA                     : ERBAGE KENGASUPEN NEHI SADA TUJUN

TUJUN                    : Gelah Moria:

• Meteh perbedan persembahan Kain ras Abil.
• Tetap nggelem teologia ibadah GBKP

METODE PA           : Curah Pendapat

Kata Penaruh.

I bas Padan Si Ndekah melala itulisken kerna ersembahen. Ertina reh ndahi Tuhan alu ukur meriah. I je ipenangkih puji-pujin man Tuhan. Lit ka i je pengakun dosa janah sura-sura mperobahi lagu langkah ku si terulin. I bas ersembah ndahi Tuhan la banci ngambe-ngambe, baba persembahen pengataken bujur erkiteken jumpa pencarin ras kesehaten entah persembahen pengalemi dosa. La terjeng maba persembahen arah bentuk ulih (barang) tapi rikut ras pusuh bage pe tujun si mehuli. Dua anak perana si jadi tokohta wari enda ersembah man Tuhan alu maba persembahen ulihna encari.

Mpebagesi Pengangken Kerna Ogen.

Kain ras Abil sada nande sada bapa, ia ersenina tapi la seri karakterna, la bali pendahinna. Duana ia ersura-sura ersembah dingen maba persembahen man Tuhan arah ulih pendahinna. I bas kitab Kejadin Kain ras Abil me jelma si pemena mpersembahken persembahen man Tuhan. Kain, sekalak perjuma,ipersembahkenna ulih jumana sada bagin man Tuhan tapi Kain ras persembahenna la ialoken Tuhan. E maka merawa ia, jut-jut ayona perbahan nembeh atena. Abil sekalak permakan biri-biri, igelehna anak biri-biri si pemena tubuh, ipersembahkenna bagin-bagin si mehulina man Tuhan (ay.4). Ngena ate Tuhan man Abil ras persembahenna. Biasana si pemenana tubuh e si mejilena, sehat ras mbur. E maka ipersembahkenna bagin-bagin si mehulina, i je teridah kualitasna ersembah. Lit persikapen i bas ersembah, la meros entah menggo ras persembahen e pe si mehulina. Kai si ipersembahkenna man Tuhan e encidahken kehamatenna ras pengataken bujur.
Labo pernah itulisken engkai maka persembahen Kain itulak Tuhan ras persembahen Abil ialoken Tuhan, i je me dolat Tuhan, IA erkuasa i bas kegeluhen, idahNa seh ku pusuh, labo lit man Dibata persembahen si galang entah si kitik tapi itandaiNa seh ku pusuh. Sikap meteruk rukur la lit i bas Kain tupung ersembah man Tuhan. Tapi Abil mpersembahken persembahenna alu meteruk ukur janah alu kiniteken ipersembahkenna si mehulina man Tuhan (Heb. 11:4). Tupung itulak Dibata persembahen Kain labo lit pertobatenna, keras pusuhna ras ilakokenna kejahaten ibunuhna agina, seh maka Dibata pe ngukum ia alu lanai masu masu pendahinna. Tupung Dibata nungkun Kain i ja agindu? Tetap ia rusaha mbenarken dirina jine, enda pe nuduhken maka la ia ermediate ras mentingken dirina jine.

Pengkenaina.

Uga caranta ersembah man Tuhan, ula min terjeng formalitas saja entah pe gelah enggo rikutken kewajipen, tapi min arusna ipersembahken man Tuhan alu pusuh si meciho ras bagi si ngena ate Tuhan. Persembahen erkawiten ras ibadah si jadi pengataken bujurta man Tuhan, i bas pemere ras pasu-pasuNa man banta. Kalak Kristen protestan, erbage-bage caranta ersembah, caranta ertoto ras teologia si anut kita pe labo bali kerina. Lit deba injili, lit deba kuat i bas missi janah adi kita Gereja suku lit keteraturen i bas liturgi. Tema-tema teptep mingguna enggo itentuken janah bali nge kerina i bas Gerejanta GBKP enda. Tapi labo perlu si perdebatken, la perlu sikataken i bas Gereja A lit Kesah Si Badia, Gereja B la lit Kesah Si Badia. "Si seri e mehuli, si pelain lain e pe mejile" arah tema-nta enda, ibabai kita ngidah caranta ersembah, dem alu persikapen encidahken kehamaten, meteruk ukur, tujunta ersembah man Tuhan ngenca (soli deo gloria). Persembahen ras muat bagin i bas ersembah labo terukur mbue ras belinna persembahenta tapi nehken persembahen e, e me respon pengataken bujurta man Tuhan ras persembahen sinipeseh kita e si persembahken alu kiniteken ras kiniteruken ukur. Caranta ersembah si pelain lain e pe labo perlu si perdebatken uga bas Gerejanta uga Gereja kalak si deban. I bas kita ersembah e jumpa min kita ras Tuhan, si bangun hubungenta ras Tuhan. Ula min sanga kita ertoto e pe si postingken "sangana ertoto", ertoto denga kin lah kita e adi si postingken kange sanga kita ertoto man Tuhan. Tupung ersembah man Tuhan e tuhu-tuhu si bangun hubungenta ras Tuhan. I bas kitab Jesaya 6:1-8, si jadi palas liturgi GBKP ituriken maka perjumpan ras Tuhan mereken kesadaren maka kita erdosa, la metunggung i lebe-lebe Tuhan. Tupung lit pengakun erdosa man Tuhan, i je kita ialemi. Kita metunggung i lebe-lebeNa, kita jadi anakNa. Perjumpan ras Tuhan maba perubahen, ngueken persuruhen Tuhan, 'i jenda aku, suruhlah aku.' Em ulih ersembah, lit sura-sura ngelakoken persuruhen Tuhan, lanai ndaram-ndarami ras mandangi perbedan tapi uga maka si pebelin sura-sura ndalanken persuruhen Tuhan, janah adi kita i bas GBKP, jaga tetap identitas Gerejanta.

Curhat Pendapat:

1. Turiken pendapatndu i ja perbedanna cara ersembah Kain ras cara ersembah Abil ras kai ulihna?
2. Kai bedana cara ersembah i Gereja Karismatik ras cara ersembah i GBKP ras uga sikapta genen si pelain-lain e?

Pdt. Natalidna Tarigan, M.Th