Bahan PJJ 30 Agustus – 05 September 2026

MAKE KATA SI PAYO

Titus 2: 1 – 8

Pengajaren si tuhu-tuhu

2:1 Tapi kam, ajarkenlah si sentudu ras pengajaren si payo.

2:2 Katakenlah man dilaki si nggo metua gelah jore min ukurna, mehuli lagu-langkahna, dingen ngasup min ngkuasai dirina; bage pe gelah tuhu-tuhu sehat kinitekenna, erkeleng-ate dingen megenggeng.

2:3 Bage pe kataken man diberu-diberu si nggo metua gelah bersih lagu-langkahna, bagi arusna. La banci ia ncekuraki kalak si deban, bage pe la banci nagih minem anggur. Ia arus ngajarken si mehuli:

2:4 ngajari diberu si nguda denga gelah keleng atena perbulangenna ras anak-anakna,

2:5 gelah ngasup ia ngkuasai dirina dingen nggeluh badia, gelah beluh ia ngaturken jabuna dingen jadi ndehara si patuh man perbulangenna; gelah alu bage ise pe la ncekuraki berita si rehna i bas Dibata nari.

2:6 Bage pe ajari anak-anak perana gelah ngasup ngkuasai dirina.

2:7 Janah kam, i bas kai pe arus jadi usihen kerna dahin si mehuli. Tutus min atendu dingen ergiah-giahlah ukurndu ngajar.

2:8 Pakelah kata-kata si payo si la banci ipandang kalak, gelah alu bage mela iakap imbang-imbangndu sabap la lit i bas kita si man pandangenna.

Titus 2: 1 – 8

Kewajiban orang tua, pemuda dan hamba
2:1 Tetapi engkau, beritakanlah apa yang sesuai dengan ajaran yang sehat:
2:2 Laki-laki yang tua hendaklah hidup sederhana, terhormat, bijaksana, sehat dalam iman, dalam kasih dan dalam ketekunan.
2:3 Demikian juga perempuan-perempuan yang tua, hendaklah mereka hidup sebagai orang-orang beribadah, jangan memfitnah, jangan menjadi hamba anggur, tetapi cakap mengajarkan hal-hal yang baik
2:4 dan dengan demikian mendidik perempuan-perempuan muda mengasihi suami dan anak-anaknya,
2:5 hidup bijaksana dan suci, rajin mengatur rumah tangganya, baik hati dan taat kepada suaminya, agar Firman Allah jangan dihujat orang.
2:6 Demikian juga orang-orang muda; nasihatilah mereka supaya mereka menguasai diri dalam segala hal
2:7 dan jadikanlah dirimu sendiri suatu teladan dalam berbuat baik. Hendaklah engkau jujur dan bersungguh-sungguh dalam pengajaranmu,
2:8 sehat dan tidak bercela dalam pemberitaanmu sehingga lawan menjadi malu, karena tidak ada hal-hal buruk yang dapat mereka sebarkan tentang kita.

(PJJ Intergenerasional 3)
ILAKOKEN ALU JETRO SISTEM

MODEL PJJ: BUDAYA KATA PERLEBE

I bas budaya kalak Karo, penting kel siajar-ajaren bage pe mereken pedah/ nasehat man keluarga, bagi nina: “Dalam hal nasehat, semua nasehat yang diberikan kalimbubu dalam suatu musyawarah keluarga menjadi masukan yang harus dihormati.” Enda mereken erti maka lit tanggung jabab i bas kalimbubu guna nehken pedah man anak beru.

Paksa enda kita ercakap kerna bahan PJJ-ta ”Make Kata Sipayo” rikutken pengajaren situhu-tuhu sinisehken Paulus man Titus segelahna tetap ngajarken cara nggeluh man perpulungen tertib i bas kiniteken, alu bage perpulungen banci jadi usihen simehuli isekelewetna. Guna mpebagesi pengangkanta kerna temata, mari dage sigargari kata Dibata enda.

ISI

Titus e me teman Paulus i bas ndahiken dahin meritaken Berita Si Meriah. Titus itadingken Paulus i Pulau Kreta gelah ipejorena dahin si perlu idungi. E maka Pulau Kreta me inganna nehken dahin pelayanen e, erkiteken perpulungen enda tuhu- tuhu terkenal i bas biakna si jahat, bagi nina sekalak nabi i Kreta nari ”Kalak Kreta perguak, bali ras rubia-rubia si merawa, kalak rangap si perkisat” (Titus 1:12).

Paulus nuruh Titus guna nehken pengajaren si payo gelah teridah perubahen kegeluhenna sue kata ras perbahanen. Guna mereken pengajaren e, penting kepeken sitandai ras ise kita ngerana, janah uga kita nehken kata alu payo. Bagi sinilakoken Paulus erbahan terpuk-terpuk perpulungen e gelah ula mesera i bas nehken pengajaren. Rikut bahan ogenta, terpuk e lit telu: Sipemena: Terpuk dilaki si enggo metua (ayat 1-2).

Sipeduaken: Terpuk diberu-diberu si enggo metua (ayat 3-5) Sipeteluken: Terpuk anak-anak perana (ayat 6-7).

Man terpuk sipemena, dilaki si enggo metua gelah jore min ukurna, mehuli lagu langkahna dingen ngasup min ngkuasai dirina bage pe gelah tuhu-tuhu sehat kinitekenna, erkeleng ate dingen megenggeng. Bage me pentingna sehat kiniteken sabab kiniteken nge simengendaliken kegeluhenta. Adi sehat kiniteken tentu labo sidalanken kerna lagu langkah si la mehuli. Adi sehat kiniteken tentu terkuasai kita dirita arah pengajuk si la payo. Adi sehat kinitekenta sekalak bapa tentu keleng atena keluargana, anak-anakna, teman geluhna janah lit kinigenggengen i bassa adi sehat kinitekenna. Si sehat kinitekenna ngasup ia nggeluhken kegeluhenna radu ras kalak si deban.

Man terpuk sipeduaken, diberu si enggo metua gelahna bersih lagu langkahna sabab bage kin arusna. Bersih lagu langkah maksudna la banci ia ncikuraki kalak si deban, sabab lit denga nge kalak bagi tempa meriah akapna ncikuraki kalak si deban. Bage pe iajarken segelahna ula nagih minem anggur. Enda situhuna kebiasan diberu i pulau Kreta si arus iperobahina. Adi nagih enda tuhu la mejile, sabab banci lanai terpengadi, umpamana nagih er-Medsos erbahanca lanai si inget waktu erdakan, nuci, mpesikap jabu, ras si debanna. Diberu-diberu si enggo metua tentu enggo melala pengalamenna i bas ndalani kegeluhen subuk i bas jabu bage pe i bas masyarakat, ia arus nggit ngajarken si mehuli man diberu si nguda denga (ay. 4). Kata ”arus” i jenda ncidahken sada kewajiben/tanggung jabab si arus isehken. Perlu iajarkenna kerna lagu langkah si bersih e me tutus erkiniteken man Dibata gelah jadi diberu si pentar i bas nehken pengajaren si payo kutengah-tengah jabuna. Diberu si enggo metua arus mereken pengajaren man diberu si nguda denga gelah terkuasaisa dirina jadi ndehara si patuh man perbulangen, keleng atena anak-anakna janah la ise pe pang ncikurakkensa erkiteken mehuli dingen bersih perbahanenna.

Man terpuk sipeteluken, anak-anak perana gelahna ngasup ngkuasai dirina. Pengajuk doni nandangi anak-anak perana tentu melala kel, maun-maun banci pengajukna ku dalan si lanai mehuli pe, e maka arus ngasup engkuasai diri. Janah ipindoken Paulus man Titus segelahna ia pe banci jadi usihen kerna dahin- dahin simehuli rikutken semangatna ergiah-giah i bas mereken pengajaren (ayat 7).

I bas si e kerina arus maka ipake kata-kata si payo, sabab adi enggo payo cara ras kata sinibelasken maka lanai lit pandangen kalak si deban man banta. Adi lanai lit pandangenta tentu mela iakap kalak si deban si lit sura-surana ndarami kesalahenta guna jadi pandangenna.

PENGKENAINA

I bas kita kalak karo, arah erbage-bage tegun/kelompok tentu ijaga kel guna banci nehken kata alu mehuli, kalimbubu nehken kata ajar man anak beru, ersenina pe saling mpersingeti, rsd. Ula sembarangen ngerana sabab banci mpeturah pandangen man banta. Banci siajar-ajaren guna meteh mehuli ras njagai kegeluhen jabuta ras kade-kadeta kerina. Bage me pe pengarapenta i bas kita, meteh kerna penting make kata si payo rikutken tema PJJ-ta, maka enda banci mpeturah hubungen simehuli antara anggota jabu (intergenerasional), umpamana orangtua ngajarken anak-anakna alu make kata si payo sibanci mereken pengertin/ pengangkan seh ku bas perubahen. Labo make kata-kata si la payo sierbahanca turah nembeh ate sierbahanca la lit perubahen simehuli.

I bas perdalinen kegeluhen tentu sijumpai ngenda kerna keuntungen ras kerugin tep-tep perbahanen sinilakoken kita. Terlebih i bas make kata si payo. Adi si pake kata si payo tentu ulihna mehuli man banta, sehat kinitekenta, lit keleng ate i bas kita janah nggeluh i bas kinigenggengen. Adi si pake kata sipayo lanai banci ipandangi kalak. Tapi sebalikna adi labo si pake kata si payo tentu kegeluhen kinitekenta pe labo sehat, maun lanai lit keleng ate i bassa sabab belinen keakunna.

Marilah si pake kata si payo gelah tetap terjaga hubungenta mehuli subuk hubungenta ras Dibata janah teridah ulihna arah hubungen mehuli ka ku sapih-sapih kita.

DISKUSI :

1. Rikutken tuan/nyonya rumah inganta pulung enda marilah sibahan pertuturenta jenari kundullah rikutken tegunta masing-masing (Kalimbubu, Senina, Anak Beru). Kenca dung e, praktekkenlah nehken kata ajar alu payo nandangi tegun si debanna. Ibenaken arah tegun Sukut, Kalimbubu ras anak Kerina tegun erbelas nehken kata alu payo. Si jadi topik pedah e me ”engkelengi jabu”.
2. Itutup alu radu ras ngendeken lagu karo ”Rudang kegeluhen”

USULEN ENDE-ENDEN:

1. KEE GBKP 202: 1,4 Ernalem Gelah Man Yesus
2. KEE GBKP 345: 1 Nggo kami sikap ndengkeh kataNdu
3. KEE GBKP 272: 1- Ise kin kami enda o, Bapa
4. “Rudang Kegeluhen”