Tanggal 02 – 08 Nopember 2025

AGAMA SI TUHU-TUHU DINGEN SI MEHULI

Jakup 1:26-27

1:26 Ise kin erpengakap maka ia kalak si eragama? Adi la ijagana dilahna sia-sia me ia eragama e, janah itipuna dirina.

1:27 Agama si tuhu-tuhu dingen si mehuli rikutken pengakap Dibata Bapanta e me: pekena-kena anak-anak melumang ras kalak si nggo mbalu si lit i bas kiniseran, bage pe njaga diri gelah ula icedaken doni enda.

Yakobus 1:26-27

1:26 Jikalau ada seorang menganggap dirinya beribadah, tetapi tidak mengekang lidahnya, ia menipu dirinya sendiri, maka sia-sialah ibadahnya.

1:27 Ibadah yang murni dan yang tak bercacat di hadapan Allah, Bapa kita, ialah mengunjungi yatim piatu dan janda-janda dalam kesusahan mereka, dan menjaga supaya dirinya sendiri tidak dicemarkan oleh dunia.

MODEL PJJ: KESAKSIAN 

KATA PERLEBE: 

Surat Jakup ngerana kerna hal-hal praktis selaku kalak Kristen. Salah sada penekanenna e me ensembah alu payo man Dibata. Sue ras tema Perpulungen Jabu-Jabunta wari enda kerna agama si tuhu-tuhu dingen si mehuli teridah arah uga cara ensembah si payo man Dibata. I bas Padan Si Mbaru, lit telu istilah si ipakeken guna nuriken erti kata ensembah (Ind-Ibadah), e me: 1) *leitourgeo* si retina ensembah man Dibata (Bnd. Perb. 13:2); 2) *latreia* si retina ngendesken kula nandangi Dibata selaku versembah en si nggeluh (Bnd. Roma 12:1); 3) *threskeia* si retina e me ensembah, ensembah labo terjeng ku bas upacara keagaman tapi teridah

arah orat nggeluh si teptep wari (bnd. Jakup 1:26-27). Istilah *(threskeia)* enda me si ipake Jakup guna nuriken pengertin ensembah man Dibata. Ensembah man Dibata arus icidahkan arah kegeluhan si teptep wari si teridah arah 3 dampar, e me: 1). ngasup njagai dilah, 2). mpekena-kena anak-anak melumang ras kalak si enggo mbalu si lit i bas kiniseran, 3). njagai diri gelahna ula icedai doni enda. 

ISI: 

Ngasup njagai dilah (Ay. 26)

Njagai i bas bahasa Junani bena katana e me *khalingogon* si retina nguasai, njagai, muniken bagepe mpekena-kena. Kalak si ensembah man Dibata arusna ngasup nguasai, njagai bagepe mpekena-kena dilahna gelah kata si ndarat arah babahna banci mpeturah kegeluhan man kalak si deban, labo nuriken kata-kata si sea-sea si erbahanca turah kearun ate bagepe kekoten nandangi kalak si deban. 

Pekena-kena anak melumang ras kalak si enggo mbalu si lit i bas kiniseran (Ay. 27)

Mpekena-kena (Ind=Mengunjungi) i bas cakap Junani e me episkeptestai si retina perbahanen si ncidahkan keleng ate janah kepate nandangj kalak si lit i bas kiniseran. Perbahanen si encidahkan keleng ate janah kepate nandangj kalak si deban si lit i bas kiniseran erpalasken alu ngumban biak Jesus si nggit pekena-kena janah ndahi kalak si ngenanami kiniseran bagepe si ngenanami perbeben. Pekena-kena anak melumang ras kalak si mbalu la terjeng ndahi ia saja ras nehken penampat. Terdauben asa si e, ndahi anak melumang ras kalak si mbalu mabai kita gelah ngasup ngangkai, ngukurken bagepe nggejapken perbeben ras kiniseran si inanamina (ber-empati). Orat nggeluh si bagenda me si enggo leben ilakoken Jesus, janah enda me si jadi uslhenta guna ncidahkan agama si tuhu-tuhu dingen mehuli.

Njaga diri gelah ula icedaken doni (Ay. 27)

Kata njagai si ipake i bas cakap Junani e me tereo. Njagai diri retina, la ikut muat bagian i bas biak-biak doni bagepe ngasup nimbak sura-sura daging segelah kalak si erkiniteken lanai seri ras doni enda selaku tanda kinihamatenta nandangj Dibata. Seh makana, si enda me jadi perayaken janah jadi orat nggeluh kalak si erkiniteken man Dibata.

PENGKENAINA :

Agama si tuhu-tuhu dingen si mehuli e me ersembah alu payo man Dibata teridah arah totalitas kegeluhen. Ibenaken arah ngasup njagai dilah, umpamana ngasup kita la nuriken berita HOAX entah pe berita si sea-sea, ras sidebanna si banci mpeturah perubaten nandangj kalak si deban. Bage ka pe kita arus ngasup njagai, engkuasai dirinta ras nimbak sura-sura daging. Terlebih i bas zaman genduari melala tantangen si banci mabai kita ndabuh ku bas biak-biak konsumerisme (boros), hedonisme (bersenang-senang) ras materialisme (mengedepankan materi) si erbahanca kita lanai nggeluh i bas

kesederhanaan (keugaharian). Selaku kalak Kristen perlu si jagai dirinta segelah la ndabuh ku bas kesenangen doni, tapi tetap ngasup ngatakan bujur man Dibata janah teridah arah kita kepate nandangi kalak si deban. Salah sada bentuk kita kepate man kalak si deban e me alu pekena-kena anak melumang ras kalak si mbalu si lit i bas kiniseran. I bas GBKp enda lit unit-unit bidang diakonia e me : YKPD Alpha Omega, PPOS Suka Makmur, PAK Gelora Kasih Suka Makmur, Komisi HIV/AIDS, Credit Union Modifikasi (CUM), Yayasan Ate Keleng (YAK), Komisi Penanggulangan Bencana (KPB). Tentuna praktik kegeluhen ensembah si payo perlu si cidahkan ku unit-unit pelayanen enda. Umpamana, i bas kita ngarihken perayaan natalta si inget guna nehken tanda keleng atenta ras kepatenta man unit-unit pelayanen diakonia GBKp enda subuk secara pribadi, keluarga bagepe kepantitaan. Sekaligus la terjeng ndahi ras mereken aksi tapi ngasup nggejapken, ngangkai ras ngukurken kiniseran si inanamina. Segelah perayaan natal labo terjeng perayan tapi lit aksinta si mabai perayaan natalta e emanam man kalak si deban bagi Jesus si tubuh emanam kempak doni enda, labo terjeng negi kata Dibata, tapi jadi "pelaku" kata Dibata i bas nehken kekelengen.

DISKUSI:

1. Turiken pengertimulu kerna agama si payo erpalasken ayat 27!

2. Seh i ja nge pengangkanta kerna mereken dukungen nandangi unit-unit bidang diakoni GBKP!

3. Turiken aksi si banci ilakoken guna mendukung unit-unit bidang diakonia GBKP!

USULEN ENDE-ENDEN:

1. KEE GBKP No 254: 1,3

2. KEE GBKP No. 348: 1,7

3. KEE GBKP No. 281: 1,3

4. KEE GBKP No. 471: 1

DAFTAR BACAN:

Pdt. Rosmery br Pinem. S.Th